स्नेही उपदेश रत्न संग्रह

छोकी निमा रिन्पोछेको जन्म सन् १९५१ मा टुल्कु उर्ग्येन रिन्पोछेको जेठा छोराको रूपमा भएको थियो। उहाँले १९७६ मा उद्घाटन भएको का-निङ शेड्रुब लिङ् गुम्बाको प्रमुखको रूपमा त्यति वेला देखि सेवा गर्दै आउनु भएको छ। रिन्पोछेले गुम्बा र सम्बद्ध संस्थाहरू एवं लगभग ५०० भिक्षु र भिक्षुणीहरूको कल्याण र धर्म शिक्षाको जिम्मेवारी बहन गर्नु भएको छ। रिन्पोछे एक सुप्रसिद्ध ध्यान आचार्य र गुरु हुनु हुन्छ। ३५ वर्षभन्दा बढी समयदेखि उहाँले नेपाल र विश्वभरका शिष्यहरूलाई मार्ग निर्देशन गर्दै हुनुहुन्छ। उहाँ अध्ययन, अभ्यास र सामाजिक कार्यमा समर्पित विश्वव्यापी बौद्ध केन्द्रहरूको संस्थापक र प्रमुख हुनुहुन्छ। संसारको जहाँसुकै पनि बुद्धका शिक्षा र ध्यान सबैका लागि सर्वसुलभ गरी उपलब्ध गराउनु रिन्पोछेको उद्देश्य र योजना हो।